გამარჯობა,
მე კახა ვაჩაძე ვარ ლეჩხუმის რაიონის სოფელ ნასპერიდან, პროფესიით არქიტექტორი და ვმოღვაწეობ სოფლის მეურნეობაში. უფრო დეტალურად რომ გაგაცნოთ ჩემი საქმიანობა, ეს გახლავთ ტყემლის ბაღები, რომლებიც გავაშენე მშობლიურ სოფელში. შეიძლება გაგიჩნდეთ შეკითხვა რატომ ტყემალი და თან მითუმეტეს ლეჩხუმში, რომელიც ყურძნით და მეღვინეობითაა ცნობილი. იმიტომ რომ ტყემალი ზოგადად ენდემური ჯიშია და ყველგან ვერ მოდის, აი მაგალითად საქართველოს დასავლეთით უკვე ისეთი ვეღარ არის ტყემალი, ან მსხმოიარობა არ უვარგა, ან გემო და ა.შ ასევე ვიტყვი რომ ვინაიდან ნასპერი მაღალზეა, ჩვენთან ტყემალი ისეთ დროს შემოდის როდესაც სხვაგან უკვე კაი ხნის მოლეულია, რაც მისი ფასის ზრდაზე მოქმედებს და ზოგადად საკმაოდ უხვმოსავლიანი ტყემალია ჩვენთან.
ჩემი იდეა იდეად დარჩებოდა რომ არა ევროკავშირის, შვედეთის და ავსტრიის მხარდაჭერით განხორციელებული პროექტი GRETA, რომლის შესახებაც სრულიად შემთხვევით შევიტყვე ცაგერში, როდესაც სულ სხვა მიმართულების პროექტით ვიყავი დაინტერესებული. პირველადი ინფორმაციის შემდეგ საკმაოდ მიმზიდველად გამოიყურებოდა აღნიშნული ახალი ინიციატივა, რომელიც ბიო მიმართულებას ეხებოდა და მაღალმთიან რეგიონებს ფარავდა. მსგავსი შესაძლებლობებით ნამდვილად არ ვართ განებივრებული სიმართლე რომ გითხრათ და ამიტომაც მონაწილეობის მიღებაზე დიდხანს არც მიფიქრია, რადგან აფინანსებდნენ ტექნიკის შეძენას და ასევე ზოგადად თანადაფინანსების პროცენტებიც საკმაოდ ხელსაყრელი იყო. დავწერე პროექტი, მალევე გავხდი ბენეფიციარი და შეიძლება ითქვას რეალურად დავიწყე საქმიანობის განხორციელება, ტყემლის ნერგები ჩემი თანამონაწილეობით იყო, ხოლო გრეტას ფარგლებში მივიღე ტექნიკური აღჭურვილობა, რაც სამებაღეო საქმიანობისთვის იყო საჭირო: ბენზოხერხი, ბენზოცელი, მულტიფუნქციური აგრეგატი რომელზეც სხვადასხვა ხელსაწყო მაგრდება, მაგალითად ტოტების მოსაჭრელი, ასევე შესაწამლი მანქანა და სოფლის მეურნეობის იარაღები.
აღნიშნულმა სამეურნეო ტექნიკამ პირველ რიგში შრომა გამიადვილა, შემდეგ ის, რომ იყო დიდი მოტივატორი, გააჩინა განვითარების საფუძველი და მცირე სამეწარმეო საქმიანობა მდგრადი გახადა, აგრეთვე გააჩინა დაინტერესება რეგიონში მსგავსი პროექტების მიმართ, რომ მათში მონაწილეობა მითი არაა და ნამდვილად შესაძლებელია.
აუცილებლად უნდა ვახსენო ჩატარებული ტრენინგები მარკეტინგული მიმართულებით, სადაც მივიღე ის საჭირო ინფორმაცია, რომელსაც აუცილებლად გამოვიყენებ ჩემი საქმიანობის შემდეგ ეტაპზე, როდესაც უკვე შევქმნი ბრენდს და დავიწყებ ტყემლის ჩამოსხმას. რადგან გეგმებზე საუბარზე გადავედით, გეტყვით რომ ტყემლის ბაღთან ერთად ვგეგმავ მოვაშენო კენკროვანი კულტურები და ჩემი ბიო ორგანული ტყემალი გავიტანო დასავლეთის ბაზარზე, რომელიც მთლიანად ქართულ ტყემალს გაუზრდის ცნობადობას.
რადგან პირველი წელია მოსავალზე ჯერ ვერაფერს ვიტყვი, თუმცა მოლოდინები კარგი გვაქვს, რადგან ეს ჯიში „წითელი დროშა“ სრული მსხმოიარობისას ჩემს 1 ჰა ტერიტორიაზე 25-30 ტონა მოსავალს მომცემს. მოკლედ გეგმები კარგი გვაქვს და ეს ჩემი ერთი შეხედვით შეუძლებელი იდეა, დღეს გრეტა პროექტის დახმარებით უკვე რეალურ საქმედ იქცა, ამიტომ სხვა დამწყებ მეწარმეებსაც ვურჩევ რომ იყვნენ განსხვავებულები და დაისახონ არასტანდარტული, რთულად შესასრულებელი მიზანი, რომელიც ვფიქრობ მეტად იქნება წარმატებული.
მსგავს საგრანტო პროგრამებში მონაწილეობის მისაღებად და ახალი საქმიანი კავშირების დასამყარებლად მუდმივად მზად ვარ და დაინტერესების შემთხვევაში დაკონტაქტება შესაძლებელია ტელეფონის: 598595827 და ელ-ფოსტის: kaxavachadze@gmail.com საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის